Aygün Rəşidova yerli və regional media qurumları ilə əməkdaşlıq edən müstəqil jurnalistdir. Rəşidova Gürcüstanın Ictimaiyyətlə Əlaqələr İnstitutunda Jurnalistika və Media İdaretməsi üzrə magistr təhsilini alıb.O, CineDOC-Tbilisi (2018-2020) və DokuBaku (2019) daxil olmaqla bir neçə beynəlxalq film festivallarında koordinator olaraq çalışıb və Sevil Film Festivalının təsisçisidir.
Pəri Abbaslı incəsənət, gender bərabərliyi, yeni media mövzularında yazan, araşdırmalar edən jurnalistdir. Rəqəmsal kontent hazırlamaq, bloq və podkast yazmaq ən əsas məşğuliyyətlərindəndir. 2 ildir ki, Sevilfestin təşkilatı məsələlərində festival menecerinə dəstək verir. Hazırda Erasmus Mundus magistr proqramının təqaüdçüsü kimi, Jurnalistika, Media və Qloballaşma üzrə magistr təhsilini Danimarka və Çexiyada davam etdirir.
Durna Səfərova “Sevil”in beynəlxalq əlaqələrini koordinasiya edir, eyni zamanda “Festivallardan seçmələr” ("Best of Fests") adlı xüsusi proqramının kuratorudur. 15 ildən artıqdır audiovizual media sahəsində fəaliyyət göstərən Durna hazırda ChaiKhana platformasının Azərbaycan üzrə meneceridir. O, jurnalistika, film istehsalı, kinoprokat sahəsində iş təcrübəsinə malikdir və sənədli kino üzrə dünyanın aparıcı satış agentlikləri ilə əməkdaşlıq edir. Durna müxtəlif qısametrajlı filmlərin müəllifidir və "Qonaq: Hələb-İstanbul", "Bütün canavarlar insandır" kimi mükafatlı filmlərin ərsəyə gəlməsində yaxından iştirak edib. Durna Səfərova hazırda Çivininq Təqaüdçüsü kimi (2022-2023) London Universitet Kollecində Kino Tədqiqatları üzrə magistratura proqramındadır.
Aygül Qurbanova yazar, kino tənqidçi və fotoqrafdır. Bir çox mədəniyyət platformasında kino və ədəbi tənqidi məqalələr yazır, hekayələr, ssenarilər üzərində işləyir. Poetik, bədii foto janrında fotolar çəkir. İncəsənətin bir çox sahəsi, yerli sənət axımları, ölkəsində baş tutan sənət hadisələri, mənsub olduğu regiona dair fərqli insan mənzərələri araşdırma yazılarının hədəfidir. Hazırda Sevil Qadın Sənədli Film Festivalının media və kommunikasiya meneceridir.
Nəzrin Əsgərova 2022-ci ildə SevilFest komandasına qonaqlarla iş üzrə meneceri kimi qoşulub. Hazırda qlobal reklam agentliyi FCB Art Group-da Mühasibat Meneceri kimi fəaliyyət göstərən Nəzrin marketinq menecmenti və reklam sahəsində də təcrübələrə malikdir.
Babək Otrok 12 ildir ki, müstəqil fəaliyyət göstərən qrafik dizaynerdir. 2017-ci ildən etibarən “Başla” hərəkatının təsis etdiyi “Quyu” jurnalının, 2021-ci ildən isə DokuBaku BSFF-nın yaradıcı rəhbəridir. Hazırda Ucqar Film heyətində qrafik dizayn və istehsal sonrası qrafika mütəxəssisi kimi fəaliyyət göstərir. Sevil Beynəlxalq Qadın Film Festivalı tərkibində ənənəyə sadiq qalaraq qrafik dizayner kimi komanda işinə rəng qatır.
Vadil SevilFest komandasına 2023-cü ildən “Məkanlar üzrə koordinator” olaraq qoşulub. O, 10 ilə yaxındır qonaqlama sahəsində çalışır. Bu sahə üzrə Azərbaycan, Türkiyə və Monteneqro daxil müxtəlif ölkələrdə fəaliyyət göstərib. Bakıda W-space, Le Château Bar, Perron adlı məkanlara iş ortaqlığı edib. Son 5 ildir ki, Bakıda Fairmont Hotelin nəznindəki bar və restoran menyularının hazırlanmasında iştirak edir.
Miray Dənizin 21 yaşı var, müstəqil rejissordur - tamamlanmış 1 bədii, 2 sənədli filmi var. Trans və LGBİQ+ aktivizmlə məşğul olur. Layihələrdə koordinator, menecer kimi fəaliyyət göstərir. Jurnalistik və araşdırma məqalələr yazır. 2 pişik anasıdır. Sevilfestdə tədbir meneceri kimi fəaliyyət göstərir.
Həsən Bədəlov kinematoqrafiya ilə həmişə ciddi şəkildə maraqlanmağa çalışıb. Bu marağı onu resenziyalar yazmağa və hətta bu yay qısa film çəkməyə vadar edib. İşi ilə bağlı olaraq həmişə film gecələrinə maraq duyub, həmçinin filmin gedişatında onun haqda məlumat vermək və filmin mesajı haqda izləyicilərlə müzakirə etmək ona daima zövq verib. Xüsusilə də, gələcəkdə film sahəsi ilə bağlı planları olduğu üçün Sevilfest-də iştirak etmək onu çox həyəcanlandırır və sevindirir.
Gülyaz Hümmətzadə Filologiya fakültəsi, "Azərbaycan dili və Ədəbiyyat" ixtisasında təhsil almış müəllimədir. Həm bakalavr, həm də magistratura üzrə BDU məzunudur. Azərbaycan Texniki Universitetində və Azərbaycan Tibb Universitetində çalışıb. Xarici tələbələrə Azərbaycan dilini sevdirməyə və öyrətməyə çalışır. Bir çox məqaləsini ixtisası üzrə, xüsusilə, mifologiya sahəsi ilə bağlı yazılar qələmə alaraq Beynəlxalq Konfranslarda iştirak edib. Sevilfestdə Şəki şəhəri üzrə koordinator kimi çalışır.
Mərmər - Gülçin Cəfərli 4 ildir ki, müxtəlif sosyal təşəbbüslərdə çalışır. Pişiyi ilə yaşayır və ona danışmağı öyrədir. IV Sevil Film Festivalında Monitorinq və Qiymətləndirmə üzrə mütəxəssis kimi fəaliyyət göstərir.
Rəfiqənin 24 yaşı var. 13 yaşından bəri fotoqrafiyaya marağı var, amma fotoqraf deyil. Kimyanı sevmir, amma kimya mühəndisliyi məzunudur. Rəsm çəkə bilmir, amma rəsm əsərlərinə heyrandır. Rəngləri çox sevir, ona görə öz şəxsi kataloqu olan “rafigatone” ilə məşğul olurdu bir ara. Arada küçələrdə tapdığı itmiş əşyaların şəklini çəkir. Çünki onların şəhərin ruhu və mənəvi xəritəsi, sakinlərindən bir xatirəsi olduğuna inanır. Ya da inanmaq istəyir. Bir arada bomba jurnal “Muza”da 3-4 məqalə də yazıb. Sənətlə hər daim necəsə əlaqəsini qorumağa cəhd edib. Ona görə də, indi SevilFestin yeni üzvüdür. Çünki, kinoları da sevir, onların insanları xilas etdiyinə inanır. Ya da inanmaq istəyir.
